Schtarchs chopfwee wo zimli rasch chunnt, meischtens nur uf einere siite (die chan aber wächsle). S cha choo wänns wil, au znacht oder am früene morge zum schlaaf uus. Am paziänt isch es nöd guet, er isch bleich und mags liecht und de lèèrme nöd verliide. Drum laat er au dläde nabe und gaat is bett. Gèèrn wirzem schlächt und er mues go chörble. Dänn gaats em aber besser. Wäner gschlaafe hät verziet sich sini migrèène wider. Mängi paziänte liidet mèè under ire malèès als underem chopfwee wos au händ.
Sonen migrèènenaafall gaat öppe e paar schtund bis drü taag. En einfache migrèène sött nöd mee als e paarmal pro monet cho, süsch isch filicht öppis fuul mit de diagnoose.
S gemeinschte a de äifache migrèène nisch, dass si am liebschte a de freie tääg chunnt, vor alem am samschtig oder suntig wo mer eso schöön uusgschlaafe hät. Lueget si zu dem tema doch au emal die änglische migraine FAQs part one aa.
Wie bim äifache chopfwee mues mer au daa für e richtigi diagnoose de paziänt genau uusfrööge. Bim undersuech chunt meischtens nüüt use. Bimene schwèèren aafal cha me mängisch es schtiifs gnick gsee, wi binere hirnhuutenzündig. Au häts empfindlichi stele ade halswirbelsüüli, sogenanti iritazioonszoone. Wämmer de paziänt reckt wies dè chiroprakter tuet so verschwindet disäbe und mängisch wirds chopfwee au besser. Di meischte paziänte händ en normaale oder liecht ztüüfe bluetruck. Mängi lüüt säged de migrèènepaziänte beschtimmti gmeinsami bsüchologischi äigeschafte naa, das schtimt waarschiinlich nööd.
Es paar paziänte händ unschbeziifischi veränderige bi de hirnschtrööm, meischtens uf einere siite i de schlööfegäged, waarschiinlich wäge durchbluetigsschtöörige. D schtroboreakzioon isch mäischtens rächt düütli, psunders i de langsame frekwänze. Bi schpeziele neue metodene gseet me ide hirnschtrööm es gschteigerets erwaartigspotänziaal.
D röntgeabkläärige bringet wie bim äifache chopfwee mäischtens nüüt. Bi junge lüüt gseet me au mängisch no rächt tüüfi impressiones digitatèè ide chopfchnöche, wo eim amel e chli wäge möglichem hirntruck ztänke gänd. Drum isch deet amel no e kompjutertomografii z empfele. T halswirbelsüüli isch meischtens gschtreckt, bi funkzioonsuufnaame gseet me mängisch isolierti blockierige oder au e vermeerti beweglichkeit.
Wieni gseit ha fint me bi de migrèènepaziänte kei gemeinsami bsüchologischi äigeschafte. Trotzdem hänts in irem läbesschtil filicht al e chli zfil truck uf de chischte, es mues imer öppis lauffe. Drum chönnt sich im einte oder andere fal sogaar e bsüchoanalüüse loone wonem paziänt chönnt hälffe siini art z läben echli z ändere. Aber au anderi endschpannigsüebige wie jooga, autogeens trèning oder biofiidbäck chamer probière, wieni das scho bim äifache chopfwee beschribe han. Ppaziänte söled es tagebuech schriibe demit mer au en mögliche zämehang zwüsched irer migrèène und enere naarigsmittelufertrèglichkeit oder anderi üsseri faktoore cha gsee. Lueged si au emal an dritte täil fo den änglische migraine FAQs part three.
Di mäischte medikamänt wonich defo schriibe würked uf de Serotonin-schtoffwächsel. Hüzutags chamer en migrèènenaafal am beschte und am schnällschte mit Sumatriptan (das ischs berüemte Imigran fo de Glaggso) behandle, womer entweder under d huut schprüzt (6-12 miligram) oder zum schlugke git (50-300 miligram). De paziänt töörf aber nie e herzbaragge ghha haa oder amene hööche bluetruck liide. Er töörf au ekäi Ergotamin-prèparaat als profilaxe neè. S medikamänt choscht no rächt fil.
Klassischerwiis phandlet mer süscht en migrèènenaafal mit Ergotamin, wo mer entweder inen muskel gschprützt oder au als zäpfli git. I de mäischten alte prèparaat hätts au no Koffein und filicht au Codein dine, plus ewentuell au no es spasmolüttikum.
Sit churzem ferzellt men au dass Lidocain als Naseschprei söl gägen Aafall nütze.
Am gschiidschte git mer aber - so mäineds ämel gchopfweeschbezialischte - es milds mitteli gäges chötzle oder öppis wo de magen aareggt, wie Metoclopramid (Paspertin©) oder Domperidon (Motilium©), womer so rasch wie mögli sött nee. Nachane, wänn de mage wider schaffet, cha de paziänt tänn Aspirin© oder Paracetamol (Postan©) schlugke. Lueged si das filicht au bi den änglische migraine FAQs part two naa.
Wän öpper mee als eimal im monet e migrèène hätt, sött er sich e profilaktischi behandlig überlege. Die chan öppen esoo uusgsee:
Es paar fo dene medikamänt händ näbewürkige wie müedi, gwichtszuenaam, trümel, tüüfe bluetruk, langsame puls oder süsch öppis cheibs. Wie gseit, schriib ich bmarkenäme nur i dere züritüütsche wersioon. Wer öppis anders fomer wett sötts mer säge.
eifachs chopfwee | eifachi migrèène | klassischi migrèène | klöschter chopfwee | gglänk-chopfwee | chopfwee nach umfall | trigeminusnöiralgii | no anders chopfwee | fröögezmi öppis | Links